चरिकोट (दीस)ः शैलुङ गाउँपालिकाले मावि गणित विषय शिक्षक नपाउँदा १२औं पटक पूरक शिक्षकको माग गरेको छ । संघीय अनुदानअन्तर्गत माध्यमिक तहका गणित विषयका दुई शिक्षक माग गरिएको भए पनि ११औं पटकसम्म दर्खास्त नपरेपछि गाउँपालिकाले १२औं पटक माग गरेको हो । शिक्षण पेशाप्रति आकर्षण घट्दै गएको कारण माग अनुरूप शिक्षक नपाएको बताइएको छ । शिक्षक अभावका कारण विद्यालय सञ्चालनमै चुनौती थपिँदा गाउँपालिकाले पुनः १२ औं पटक सूचना सार्वजनिक गरेको छ । करारमा खुलेका विज्ञापनमा केही मात्र दर्खास्त परे पनि छोटो समयको लागि भएकोले संघीय तथा प्रदेश अनुदान कोटामा काम गर्ने योग्यता भएकाहरूले सो पदमा दर्खास्त दिन आकर्षण नभएको नेपाल शिक्षक संघ भीमेश्वर नगरपालिकाका अध्यक्ष युवराज पाठकले बताउनु भयो ।