चरिकोट (दीस) ः समाजसेवी निता राउतले दोलखाको गौरीशंकर गाउँपालिका–५ सुरीस्थित विष्णुश्वरी प्राथमिक विद्यालयका विद्यार्थीलाई न्यानो कपडा वितरण गरेकी छन् ।

विद्यालयमा अध्ययनरत कक्षा १ देखि ५ सम्मका १७ जना विद्यार्थीलाई स्वीटर र टोपी वितरण गरिएको विद्यालयका प्रधानाध्यापक सूर्य बहादुर खत्रीले जानकारी दिनुभयो । उहाँका अनुसार तीमध्ये ७ जना विद्यार्थी सुरेल समुदायका हुन् । सो अवसरमा विद्यालयका पाँच जना शिक्षकलाई समेत जाडोयाममा प्रयोग हुने न्यानो कपडा प्रदान गरिएको थियो ।

न्यानो कपडा वितरण कार्यक्रम विद्यालय व्यवस्थापन समितिका अध्यक्ष अमृत बहादुर कार्कीको अध्यक्षतामा तथा गौरीशंकर गाउँपालिका–५ का वडाअध्यक्ष सुन्दर खड्काको प्रमुख आतिथ्यतामा सम्पन्न भएको थियो । कार्यक्रममा भीमेश्वर नगरपालिका–७ का वडाअध्यक्ष विनोद तामाङ, सुरेल जाति उत्थान समाजका पूर्वअध्यक्ष सुवास सुरेल, अभिभावक र विद्यालय परिवारको उपस्थिति थियो ।

सामाजिक उत्तरदायित्वअन्तर्गत निता राउत फाउण्डेशनले दोलखा लगायत देशका दुर्गम विद्यालयमा अध्ययनरत बालबालिकालाई न्यानो कपडा र स्टेशनरी सामग्री वितरण गर्दै आएको छ । राउतले आफ्नो पारिश्रमिकको केही हिस्सा फाउण्डेशनमार्फत सामाजिक सेवा र शैक्षिक सहयोगमा खर्च गर्दै आएकी छन् ।