चरिकोट (दीस)ः  दोलखाका प्रमुख जिल्ला अधिकारी हरी  प्रसाद घिमिरेले आगामी फागुन २१ गते हुने प्रतिनिधिसभा निर्वाचनलाई शान्तिपूर्ण, निष्पक्ष र व्यवस्थित रूपमा सम्पन्न गर्नु आफ्नो पहिलो प्राथमिकता रहेको बताउनु भएको छ  ।
पर्वत जिल्लाबाट सरुवा भएर दोलखा आउनु भएका प्रमुख जिल्ला अधिकारी घिमिरेले सोमबार जिल्लास्थित सञ्चारकर्मीहरूसँगको भेटघाटमा सरकारले निर्वाचनको मिति घोषणा गरिसकेको उल्लेख गर्दै प्रशासनिक तयारी अब निर्वाचन केन्द्रित बनाइने स्पष्ट गर्नुभयो । निर्वाचन सफल बनाउन सबै सरोकारवाला निकायको सहकार्य आवश्यक रहेको उहाँको भनाइ छ ।
प्रमुख जिल्ला अधिकारी घिमिरेले निर्वाचनलाई लक्षित गरी सुरक्षा व्यवस्था, प्रशासनिक समन्वय तथा व्यवस्थापनलाई प्रभावकारी बनाइने जानकारी दिनुभयो ।  फागुन २१ गते हुने प्रतिनिधिसभा निर्वाचनलाई सफल बनाउन राजनीतिक दल, सञ्चारमाध्यम, नागरिक समाज तथा सर्वसाधारणको जिम्मेवार भूमिका अपरिहार्य रहेको भन्दै उहाँले सबै पक्षसँग सहयोग गर्न आग्रह गर्नु भयो । जिल्लामा रहेका समसामयिक समस्या समाधानका लागि मिडिया क्षेत्रसँग सहकार्य गर्दै अघि बढ्न आफू तत्पर रहेको उल्लेख गर्दै उहाँले तथ्यपरक र जिम्मेवार पत्रकारिताले प्रशासन र नागरिकबीच विश्वास अभिवृद्धि गर्ने बताउनुभयो । उहाँले जिल्लाभित्र शान्ति सुरक्षा कायम राख्नुका साथै सुशासन प्रवद्र्धनमा योगदान पु¥याउन आफू प्रतिबद्ध रहेको स्पष्ट पार्नुभयो  । साथै, जिल्लास्थित सबै सरकारी कार्यालयहरूलाई जनमैत्री, उत्तरदायी र सेवामुखी बनाउने दिशामा प्रशासन सक्रिय रहने उहाँको भनाइ छ । प्रमुख जिल्ला अधिकारी घिमिरे सरुवा भएर दोलखा आएपछि सोमबार जिल्लाका सञ्चारकर्मीहरूसँग औपचारिक भेटघाट गर्नु भएको हो ।