चरिकोटः भक्तपुरमा जारी नेकपा एमालेको ११ औँ  राष्ट्रिय महाधिवेशनमा दोलखाका नेताहरूले विभिन्न पदमा उम्मेदवारी दर्ता गर्नुभएको छ । आज भएको उम्मेदवारी दर्ताअनुसार उपमहासचिव पदमा आनन्दप्रसाद पोख्रेल र सचिव पदमा रचना खड्काले उम्मेदवारी दर्ता गराउनुभएको छ ।

त्यसैगरी खुला केन्द्रीय सदस्य पदमा पार्वत गुरुङ र ईश्वरी रिजालले उम्मेदवारी दर्ता गराउनुभएको छ । केन्द्रीय सदस्य पदमा भूगोलतर्फ ईश्वरचन्द्र पोखरेल तथा महिलातर्फ उर्मिला सुनुवारले उम्मेदवारी दर्ता गराउनुभएको छ । प्रेस चौतारीका पूर्व अध्यक्ष गणेश बस्नेतले खुला केन्द्रीय सदस्य पदमा उम्मेदवारी दर्ता गराउनुभएको छ ।

यस्तै लेखा आयोग सदस्य पदमा शान्ति पाख्रिन ,पुर्णिमा खरेल, र दिल्ली ध्वज बराइलीले उम्मेदवारी दर्ता गराउनुभएको छ ।

नेकपा एमालेको महाधिवेशनमा अध्यक्ष पदका लागि केपी शर्मा ओली नेतृत्वको एक प्यानल र ईश्वर पोखरेल नेतृत्वको अर्को प्यानलबाट आज उम्मेदवारी दर्ता भएको हो । आज उम्मेदवारी दर्ता सम्पन्न भएसँगै भोलि महाधिवेशनले निर्वाचनमार्फत नयाँ नेतृत्व चयन गर्ने कार्यतालिका रहेको छ ।